Ung í Føroyum Tíðindi

Tónleikaverksmiðjan í stuttum

2012-02-23T04:53:00.000-08:00

Nicolai Jensen, stóribeiggi hjá Tónleikaverksmiðjuni, sigur frá:

1. dagur

Aftaná sýningarnar vóru vit í tónleikabólkinum býtt upp í 4 bólkar. Síðani fóru vit hvør til sín at skriva eitt lag. Eg byrjaði við at hjálpa runt í bólkunum við ymisk umhugskot, tad sama gjørdu Niclas og Lena. At enda høvdu bólkarnar fingið hol á sangskrivingini.

2. dagur

Vit byrjaðu beinanvegin at royna at skriva løgini liðug til klokkan 13. Bólkarnir vóru tó lidnir uml. kl 16. Tá savnaðust vit og royndu at seta bólkar saman, so at hvør bólkur fekk ein tummuspælara. Løgini vóru presenteraði fyri bólkunum og kritikkur og hugskot til framførslu varð givin. Vælnøgd og væl á leið til konsertina sunnudagin, endaðu vit dagin. Hugnakvøldi var komi, og eg goymdi meg All around. (Sipað verður til postarenningina, har ein postur var "Finn Nicolai") :)

3. dagur

Øll framførdu fyri hvørjum øðrum og vit vandu løgini so væl vit kundu. Vit bóru útgerðina inn í konsertsalin og tóku sangirnar ígjøgnum nakrar ferðir fyri at vissa okkum um, at alt var, sum tad skuldi, td. ljóðið í monitorunum, ljóð levels.

Vit fóru hvør til sín og gjøgnumgingu sangirnar, so at vit vóru mentalt klár til framførsluna.

Her eru fleiri myndir frá verksmiðjuni:

UíF 2012 Tónleikaverksmiðjan

Endaspurturin hjá myndlistafólkunum

2012-02-19T07:08:00.000-08:00

Lydia Hansen, stórasystir á Myndlistaverksmiðjuni, skrivar:

Í dag hava tey ungu í verksmiðjuni hongt listaframsýningina upp sjálvi. Eisini hava tey lagt síðstu hondina á “maskottin” Ib, ið skal sýnast fram á pallinum. Tey fyrireika seg til endaframførsluna, og hava funnið ein hátt at taka lut á pallinum, júst sum hinir luttakararnir.

Tey í myndlist hava fingið nakrar draktir frá sjónleikaverksmiðjuni, ið tey hava málað. Meðan tíð er, so sita tey í løtuni og arbeiða uppá nýggj listaverk, ið skulu vera við til listaframsýningina hjá teimum.

Sunnumorgun í fullari ferð

2012-02-19T05:35:00.000-08:00

Í morgun vóru fólk ikki so tíðliga á fótum sum í gjár, og kvirt var við morgunmatarborðið.

Felagsupphitingin setti spakuliga ferðina upp. Annfinnur fekk øll uppá gólv og Brandur hevði eitt snarskeið í ninjakonsentratión.

So kom ferð á verksmiðjurnar og allan fyrrapartin hevur húsið surrað av fólkið. Myndlistafólkini hava hongt upp stóra framsýning, og sangur hevur ljóðmað úr Dansisalinum, har tónleikararnir venja sínar nýskrivaðu sangir.
Stórasystkini hava gingið kring húsið og sett upp løgin ting, eftir boðum frá framleiðarunum.

Nú eftir døguðran eru pallroyndirnar farnar í gongd og kl. 14:30 verður aðalroynd.

Frásagnarverksmiðjan leggur seinast hond á

2012-02-19T04:03:00.000-08:00

Sunniva Holm Poulsen, stórasystir í Frásagnarverksmiðjuni, skrivar:

Í morgun deildi frásagnarverksmiðjan seg tvey og tvey, og luttakararnir greiddu hvør øðrum frá eini søgu ella hending úr lívi sínum. Síðan skuldu tey megna at siga eina søgu, ið tey einans høvdu hoyrt einaferð, og greiða frá sum var hon teirra egna. Í øllum søgunum vóru dramatisk tema og effektir, og vístu at nógvar góðar søgur liggja goymdar í teim ymsu hendingunum og upplivingunum úr okkara egna daglidegi og lívið.

Arbeitt verður víðari við søguni um Einu, ið luttakararnir gjørdu í felag í gjár, og hon fer at verða at hoyra í stóru sýningini í kvøld.

Atgongumerki til sýningina kunnu keypast á www.nlh.fo

Fjølbroytt skrivikynstur

2012-02-19T03:51:00.000-08:00

Regin í Dali, stóribeiggi í Skriviverksmiðjuni, skrivar:

Eftir morgunmatin fór skriviverksmiðjan undir at líma orð, tey høvdu klipt út kvøldið fyri, niður á lita papp. Henda venjing ber heitið ”Cut Up”. Við ”The Civil Wars” í oyrunum vóru øll spent við at koma í gongd. Surrealistiska sjálvportrettið tey fingu burturúr var bæði undrunarvert og stuttligt.

Eftir fruktsteðgin fóru øll inn í verksmiðjuna aftur, og næst á listanum var at lurta eftir einum tónleika stykki í 15 minuttir. Tá stykki var liðugt, mátti arbeiðsfólki fram í teimum ungu. Nú var at skriva tær associatiónir tey høvdu til stykki, niður. Tvær fóru at gera tekst til ein av tónleikabólkunum, meðan hini arbeiddu víðari við sang-associatiónuum.

Aftaná døgurðasteðgin fóru luttakarnir í ymsar bólkar, og fóru út á hinar verksmiðjurnar at skriva.

Fyri at taka samanum so byrjaði skriviverksmiðjan eitt sindur friðarliga og róliga, men eftir døgurða so fóru tey í gongd við einari rúkandi ferð og nógv kom burturúr.

UíF 2012 Skriviverksmiðjan

Leygardagurin samanumtikið

2012-02-19T02:27:00.000-08:00

At greiða stutt frá einum degi við so nógvum ótrúligum á skránni, er ikki ein einføld uppgáva.

Fyrst mugu vit ímynda okkum, t Norðurlandahúsið er á tremur við kreativum ungfólkið. Í hvørjum króki eru bólkar sum skapa, nøkur skriva, onnur yrkja nýggjar sangir. Nøkur siga frá søgum, sum tey júst hava funnið uppá. Einastaðni flúgva reyðir bóltar í luftini og aðrastaðni ganga tey í takt til eina trummu. Hetta ljóðar ikki beinleiðis friðarlig, men satt at siga var óvanliga friðarligt í Norðurlandahúsinum í gjár.

Skapandi processin er altíð sera fjølbroytt, men helst er tað galdandi fyri tey flestu, at tær løturnar tú fært mest burturúr, varnast onnur ikki, at tú ert til. Soleiðis kendist tað í gjár. Øll seksti ungfólk vóru so upptikin av tí tey skaptu, at stundir vóru ikki til at rokast.

Í Sirkusverksmiðjun lærdu tey so nógvar ymsar hættir sum gjørligt at lofta stykkum av reyðum túll og reyðum bóltum í øllum støddum. Hálvur annar dagur er ikki nóg mikið at læra sirkuskynstur. Hetta skalt tú venja í áravís, um tú skalt gerast veruliga góður, men at tað við góðar vegleiðing ber til at koma langt, gongur sjón fyri søgn á Ungu í Føroyum.

Tónleikaverksmiðjan plagar at verða i Dansisalinum, tí har er einasta rúmið, sum er ljóðdoyvt. Hetta vikuskiftið er Dansistovan har tey minst hava verið. Tey hava sitið í smáum bólkum í øllum møguligum krókum og yrkt og vant. So friðarligt sum man ikki kann vænta at modernaður tónleikur kann vera. Áhugavert verður at hoyra, hvussu tað fer at ljóða á pallinum sunnukvøldið.

Skriviverksmiðjan hjá Petur Pólson hevur verði eins óstøðum og tónleikararnir. Tey hava verið at funnið kring alt húsið, djúpt konsentreraði skrivandi tekstir kveiktar av tí sum er kring tey.

Myndlistaverkamiðjan hevur satt at siga verið tann mest larmandi, men tað er bert tí tey hava stuttleika sær. Í verkstaðinum handan pallin hava tey teknað risastóra felagsmynd, tekna felagsmyndir uppá tíð og modellera egnar standmyndir.

Frásagnarverkamiðjan hjá Kate Corkery hevur verið í stóra salinum ein part av degnum. Tey hava yrkt eina søgu saman og vant at siga frá henni.

Sjónleikararnir hjá Annfinni Heinesen hava gjørt leikbrot við stórum kenslum og fáum orðum, tað hevur verið hugtakandi at eygleiða.

Leygarkvøldið endaði við hugnakvøldið í føstulávintshýri og opnum palli við sera ymsum framførslum.

Fingið nógv burturúr í Sirkusverksmiðjuni

2012-02-18T23:04:00.001-08:00

Bjarni Falkvard Joensen, stóribeiggi í Sirkusverksmiðjuni, skrivar:

Hesir seinastu dagarnir hava verið bæði stuttligur og læruríkir. Fólkini í verksmiðjuni hava verið røsk at fylgja við, og gjørt, sum hevur verið sagt. Vit hava fingið nógv burtur úr bæði í dag og í gjár, og vit eru so smátt vorðin klár til framførsluna í annaðkvøld.

Hóast sínir málsligu avmarkingar dugir Joel væl at læra frá sær, og er eftir mínum tyki ein ógvuligani dámligur maður. Hann hevur nógv at læra frá sær, men tíverri er tíðin ov stutt til at læra meira. Tað vit hava fingið burturúr, hevur ikki verið til fánýtis.

Enn er ein eydnuríkur dagur eftir at framleiða so nógv sum vit kunnu, og vit bíða spent til framførsluna. Men alt hevur sín enda, í morgin fara fólk heim nógvum nýggjum vinum og góðum minnum frá Ung í Føroyum.

''Leingi livið'' Sirkusverksmiðjan.

Uíf 2012 Sirkusverksmiðjan

Leygardagurin í sjónleiki

2012-02-18T23:04:00.000-08:00

Jimmy Jønsson, stóribeiggi í Sjónleikaverksmiðjuni, skrivar:

Fyrst vil eg siga, at eg eri hvørt ár bilsin um, hvussu fantastiska nógv man kann fáa burturúr uppá so stutta tíð; tað er heilt ótrúligt.

Vit byrjaðu dagin við at gera nógv sjónleikavenjingar, sum hita upp kropp og rødd og týdningarmest av øllum, setur okkum betri í samband við okkara kenslur, so at sjónleikur kann blíva so veruligur og kensluríkur sum gjørligt.

Vit hava síðani fingið 4 smáar leikir upp at koyra, har ætlanin er at framføra tveir av teimum live og tveir við video, men tað er sjálvandi eingin garanti at sama ætlan verður galdandi í morgin.

Gjøgnumgangandi tráður í venjingunum, hevur verið at fáa mest møguligt søgu og handling við einans kenslum og reaktiónum, heldur enn at brúka nógv orð. Alt hettar hava vit at fingið liðugt uppá ein dag!

Eg má geva Annfinnur rós fyri at klára at fáa so nógv burtur úr luttakarum, har summi ongantíð hava roynt sjónleik fyrr, og eg má geva luttakarunum rós fyri teirra stóra vilja til at læra og blóma í kreativiteti.

Eg gitið út frá tí, sum eg havi sæð í dag, at morgindagurin, fer mest av øllum at snúgva seg um at fínpussa alt, sum vit hava fingið burturúr í dag, og eg ivist ikki í, at tað fer at vera fantastiskt.

UíF 2012 Sjónleikaverksmiðjan

Leygardagurin í myndlistverksmiðjuni

2012-02-18T12:25:00.000-08:00

Lydia Hansen, stórasystir í Myndlistaverksmiðjuni, skrivar:

Dagurin byrjaði við at ungdómurin teknaði hvør sær tíðaravmarkað, og síðani góvu tey tekningina víðari til síðumannin/kvinnuna.

Síðani fóru tey í gongd við egið verk, ið er ein “maskottur” fyri verksmiðjuna á hesum sinnið. Sokallaði “maskotturin” er ein samanseting av 30 ørkum, ið ímynda ein figur, sum tey sjálvi hava gjørt. Annars hava tey eisini havt møguleikan at gjørt figurar úr leiðri.

Sum heild hava tey havt rættiliga fríar teymar, men einasta treytin er, at tey einans kunnu arbeiða við svørtum og hvítum.

Tey ungu hava annars stuttleikað sær óført við koli, og tey flestu høvdu uppá eitt ella annað tíðspunkt svart andlit av koli.

Tónleikur hevur verið ein stórur partur av verksmiðjuni. Luttakararnir hava havt møguleika at lurta eftir egnum tónleiki, annars undir diktaturinum hjá verksmiðjuleiðaranum, sum síðani hevur havt ávirkan á teirra arbeiðsferð.

UíF 2012 Myndlistaverksmiðjan

Ein smakkiroynd frá frásagnarverksmiðjuni

2012-02-18T12:08:00.000-08:00

Sunniva Holm Poulsen, stórasystur í Frásagnarverksmiðjuni, skrivar:

Í dag hevur frásagnarverksmiðjan arbeitt við at fáa ein karakter livandi, og hvussu ymisk fysisk eyðkenni og kroppsfokus stuðla upp um eginleikar og sermerki hjá ein 'leikluti', í søguni tú sigur. Hetta kann vera alt frá eini nøs, ið forvitin snoddar eftir slatri, eini brættari bringu, ið sigur frá dirvi og høgum sjálvsáliti til hendur, hvørs flákran avdúka ivasamar tankar.

Luttakararnir hava í felag skapað eina søgu um ta sjálvglaðu og forkelaðu Einu, hvørs foreldur gera og orna alt fyri hana, so at henni ikki nýtist at lyfta hond frá síðu.

Tá foreldrini bæði tvey gerast so sjúk, at tey kunnu ikki gera annað enn at liggja í songini, ber ikki longur til hjá Einu at sita og smílast eftir sínu egnu spegilsmynd. Hon má út at finna eitt hvørt at lekja foreldrini, men er loysnin í veruleikanum nærri enn hon nakrantíð hevði ímyndað sær?

At framleiða eina (fram)sýning

2012-02-18T12:01:00.000-08:00

Jóhanna Magnussardóttir, stórasystir hjá framleiðarunum, skrivar:

Um vikuskiftið hava ungdómar og ungdómsmentan hertikið Norðurlandahúsið í Havn og sunnukvøldið verður stór sýning við úrslitunum hetta vikuskiftið. Her er sjálvandi talan um ungdómslistastevnuna Ung í Føroyum, ið er annað hvørt ár í Norðurlandahúsinum.

Onkur spurdi, hvussu tað bar til at gera eina sýning sunnukvøld, har tilfarið varð framleitt sama vikuskifti. Hetta er ógvuliga spennandi, tí sýningin hongur í leysari luft heilt inntil hon sunnukvøld verður loftað, og alt tekur form. Í ár eru tað dramaturgarnir Birna Heinesen og Rakul Thomsen, ið framleiða endasýningina.

Enn ber ikki til at siga, hvussu framførslan verður – bara tað, at hon plagar at vera fantastisk og at tað, ið arbeitt verður við, er ótrúliga spennandi. Tó ber til at siga, at verksmiðjuleiðararnir og framleiðararnir hava verið á fundi í dag og ungdómarnir eru fult í gongd. Her verða løg smíðað, tekstir skrivaðir og søgur sagdar. Her hava verið reyðir bóltar í øllum hugsandi støddum í luftini størsta partin av degnum og ein blómuhandil fekk ein heldur løgnan ordra í dag. Ein rúgva av stólum eru eisini fluttir, men meira vildi sjónleikarabólkurin ikki siga. Eisini segði verksmiðjuleiðarin í myndlist, at hansara ungdómar høvdu arbeitt við bólkatekningum – serliga okkurt við kropslutum í óvanligum støddum.

Framleiðararnir siga, at tær fara at fáa ungdómarnar at brúka stóran part av húsinum – ikki bara pallin – og at sýningin verður í gongd frá byrjan til enda uttan steðg og uttan eina friðarliga løtu. Rest ber til at síggja í Norðurlandahúsinum kl. 18.00 sunnukvøldið.

Atgongumerki á 80 kr. kunnu keypast á www.nlh.fowww.nlh.fo og í húsinum.

Kreativiteturin blómar, eisini í døgðurasteðginum

2012-02-18T06:37:00.000-08:00

Nú er døgðurin farin afturum og verksmiðjuleiðarar og framleiðarar av felagssýningini sita á fundi. Tey skulu samráðast um, hvussu tey halda fram, tað sum eftir er av stevnuni, fyri at fáa tilfar til stóra endabrestin.
Higartil hava luttakarar og verksmiðjuleiðarar arbeitt sera fítt, lært hvønn annan og list teirra at kenna, nú fer at verða neyðugt at velja til og frá, so øll kunnu vera nøgd við úrslitið.

Døgðurastegður

Listaframsýningin UíF2012

2012-02-18T06:20:00.000-08:00

Finn Haraldson skrivar:

Fríggjakvøldið lat ein sera fjølbroytta myndaframsýning upp í forhøllini í Norðurlandahúsinum. Tó vóru ikki bert myndir sýndar, men eisini ein standmynd og ein træskurður. Stílurin á teimum nógvu listarverkunum var fjølbroyttur. Hvørt listafólk hevði millum eitt verk og fýra verk. Nøkur vóru myrk, meðan onnur vóru ljós; nøkur álvarslig, men onnur skemtilig; summi av teimum vóru makabur, og onnur vóru føgur. Men eitt høvdu tey øll tilfelags: Tey vóru á tremum við kreativari orku.

Her ber til at síggja øll listaverkini:

Listaframsýningin 2012

Listaverkini vera hangandi eina viku fram, so tey, sum vitja Norðurlandahúsið, kunnu síggja kreativu verkini.

Hetta er ein vaksandi framsýning, listaverk sum verða framleidd á stevnuni, koma upp at hanga so hvørt. Tey, sum koma at síggja stóru almennu sýningina sunnudagin, kunnu njóta eina væl størri framsýning.

Ung í Kava 2012

2012-02-18T02:40:00.000-08:00

Sum væntað, nú Ung í Føroyum er farið í gongd, er kavin komin. Síðani fyrsta stevnan var í 2001, hevur bert ein UíFstevna í Norðurlandahúsinum verið uttan kava.

Longu klokkan hálvgun byrjaðu fólk at koma niðan úr B36 húsinum, kavaklødd. Øll vóru so svong, at tey fóru í at fáa sær, longu áðrenn liðugt var at seta á borðið.
Kl. 9 høvdu Joel og Kate, ávikavist verksmiðjuleiðarar í sirkus og frásøgn morgunupphiting, og síðani fóru øll í sínar verksmiðjur at arbeiða.

Her eru fleiri myndir frá í morgun:

Leygarmorgun

Flottar innanhýsis framførslur

2012-02-17T23:30:00.000-08:00

Finn Haraldson, stórasysktin, skrivar:

Nógv ung møttust í dag í Norðurlandahúsinum og vóru spent til at byrja stevnuna, Ung í Føroyum 2012. Luftin var full við kreativari orku, og ung prátaðu og sussaðu um, hvussu stevnan man fara at verða í ár, og hvussu hevur verið fyrru árini.

Bjørn Kalsø

Mentamálaráðharri, Bjørn Kalsø, setti Ung í Føroyum í ár. Hann greiddi okkum frá um endamálið við stevnuni og um, hví tað er neyðugt ein tílík stevna er til í Føroyum. Nógv hevði Bjørn Kalsø uppá hjarta. Tey ungu skuldu vita, at vaksin kunnu ikki leggja tankar niður í tey, tí tað mugu tey sjálvi. Hann segði, at ung eru størsta tilfeingið í samfelagnum, og at mentan og list eru livæðrarnar í tí. Vit kunnu ikki vera fyri uttan ung, og tí er týdningarmikilt, at tey ungu slóða sína egnu lívsrás heldur enn at bert fylgja øðrum. Bjørn Kalsø rósti tiltakinum og fyriskiparunum og ljóðaði til at vera fegin um, at slík stevna er til í Føroyum, har ung koma saman fyri at skapa.

Aftaná hesa stuttu røðuna byrjaði framførslan hjá teimum ungu fyri tey ungu. Á tilmeldingarseðlinum til Ung í Føroyum var møguleiki at skriva seg til at sýna list á listaframsýning ella at framføra palli tað fyrsta kvøldið í stevnuni. Um tey valdu tað, so høvdu tey betri líkindi fyri at sleppa inn. Av tí sama vóru nógvar pallframførslur og fram, og øll vóru sera spent uppá at síggja og hoyra, hvat hini høvdu at bjóða uppá í kvøld. Í ár hava øll, sum eru sloppin inn á stevnuna eitthvørt at sýna fram.

Fyrsta innslag í kvøld var Laura Edit Tórhaldsdóttir og Nikolai Jensen, sum framførdu sangin “Fever”. Síðani vóru tað Kasandra Sandá Joensen, Natalia Vár Mortensen og Una Rósa Birgirsdóttir, sum vísu ein film við einari montage av myndum, leir-, og negl-hondverk. Aftaná spældi Gert Wiberg Joensen sangin “Ongin Broyting” á guitar, sum hann sjálvur hevði skrivað. Síðani var tað Jana Nielsen við “Für Elise” á klaver. Jákup D. Kjærbæk spældi “Windy and Warm” á guitara. Aftaná Jákup kom Gwenael Akira Helmsdal Carré á pallin og spældi “Trois pieces pour clarinette” eftir Stravinsky á klarinet. Kristina Clementsen las yrking upp, sum hon hevði skrivað í ár. Síðani sang Simona á Fríðriksmørk sangin “Tell Me I'm Wrong” við guitara, sum hon sjálv hevur skrivað. Aftaná hana var tað Kristianna Marnersdóttir Egholm, sum spældi á guitar og sang “Wild Horses”. Hildur Niclassen spældi eitt vakurt guitara lag. Aftaná spældi Kristian Magnus tvey cover-løg á klaver, “Party Rock Anthem” og “Rolling In The Deep”. Síðani bleiv ein stuttfilmur um ótrúskap vístur, gjørdur av Gunnbjørg Amondsen. Aftaná hetta fingu vit eina a cappella útgávu av “Annie's Song” frá Elisabeth Nygaard. Eftir hetta var ein steðgur.

Veruliga endamálið við steðginum var at hyggja at listarverkunum í forhøllini, sum vóru alt frá myndum og stanndmyndum til listahandverk. Tað var sera áhugavert at síggja, at í allari múgvuni av fólki, var ein felags kensla til staðar; ein kensla av, at okkurt nýtt og spennandi fór at henda hetta vikuskiftið. Kreativ hugskot vórðu blakað aftur og fram.

Aftaná steðgin fóru Harald Joensen og Sasho Bjartsson uppá pallin og framførdu ein stuttan skemtileik um 50 ára brúdleypsdagin hjá einum hjúnum, sum ikki vóru heilt lukkulig saman. Jón Bech og Baldur M Pais-Meitil vóru næstir við teirra egna sangi “Friendzone”, sum teir søgdu vera akkustiskur popp-tónleikur. Síðani vísti Jannik Jensen eina upptøku av einari jólaframførslu, har sangurin var um nakrar piparkøkumenn. Og so var aftur ein a cappella sangur á skránni, hesuferð sungin av Erla Drós E. Simonsen - “Lost”. Anna Katrina Danielsen og Gunn Helena Johansen vísu ein film, sum æt “Fimleikur”, sum tey søgdu vera ein “heilsufilmur”. Eftir filmin komu Andrias H. Blaasvær og Rúni Haraldson á pallin og spældu “Ave Maria” á violin og guitara. Jasmin Mote sang síðani “Jar of Hearts” við hjálp av einum back-up track. Síðani var ein teknifilmur vístur av Rakul Jensen “Animated Animal Art”. Gwenaël kom aftur uppá pallin at spæla, men hesuferð saman við Sissal Hjaltalin; tey spældu bæði eina klarinetduet eftir Poulenc. Sarita Holm Thomsen vísti okkum eina mynda-montage, sum varieraði frá býarlívi til náttúru. Aftaná hetta kom eitt øðrvísi innslag av Anton Storm Wich, sum vildi sleppa at tosa á enskum; hansara framførsla var frásøgn um sagnir og mytur í tí bygdini, sum hann var frá. Ein triðja a cappella framførsla var eftir, hesuferð av Sissal Hjaltalin og Bjørk Jónheðinsdóttir Tróndheim, sum sungu “Into the West”. Við ukelele og sangi framførdu Magnus sigurd Fjallsá og Hugin B. Knudsen “The Lazy Song”. Rebekka Petersen sang egið lag við guitara, sum æt “Har, sum eg finni frið”. Rani Ravnsfjall var síðstur við guitara-spæli “Slowdancing in a Burning Room”.

Framførslurnar endaðu við, at Hedvig Westerlund-Kapnas takk fyri og greiddi frá mannagongdini framyvir hetta vikuskiftið. Gjøgnum alt kvøldið var týðiligt, at øll vóru í góðum lag og dámdu væl framførslurnar hjá hvørjum øðrum. Inspiratión var nokk av í kvøld. Hvat fer at henda hetta vikuskiftið, og hvat fáa tey ungu burturúr at læra frá hvørjum øðrum? Tað fáa vit at síggja sunnudagin.

Fleiri myndir frá fríggjakvøldinum eru at finna her.

Fríggjakvøldssýningin

Pallroyndir 16. februar 2012

2012-02-17T01:55:00.001-08:00

Finn Haraldson, stórasystkin á Ung í Føroyum, skrivar:

Stilt var í Norðurlandahúsinum í dag. Vanliga hevur tað hvørt ár um hesa tíð verið nógv at gera við fyrireikingum til pallroyndinar. Hesaferð gekk tó alt so væl fyri seg, at nógv tíð var til yvirs millum hvørja royndarframførslu. Tíðin var væl brúkt av luttakarunum, og øll vóru sera gávað og dugnalig og tyktust ikki til at vera nakað serliga nervøs.

Elisabeth Nygaard

Mesta av degnum gekk heilt stillisliga fyri seg, tí hjá summum tók tað ikki meira enn nakrar heilt fáar minuttir at fyrireika og framføra teirra stykki. Tónleikararnir vóru fyri tað mesta solistar við antin lættum ljóðførum, ella var ljóðføri longu til staðar á pallinum allan dagin.

Nakrir av luttakarunum søgdu okkum eitt sindur um seg sjálvar.

Andrias H. Blaasvær & Rúni Haraldson

Beiggjarnir Andrias og Rúni spældu eina duetina Ave Maria hjá J.S. Bach - Andrias spældi violin, meðan Rúni stuðlaði við guitar-spæli.

Andrias hevur vant violin í eitt ár á Musikskúlanum, og longu dugdi hann at spæla ein av teimum vøkru stykkjunum hjá Bach. Rúni hevur spælt guitara í skjótt 7 ár, har hann hevur roynt ymiskt innan tónleik. Millum annað var hann guitara-spælari í bólkinum Euthanasia, hevur spælt á ymiskum bólkum í Margarin-fabrikkini, venur viola í sínari frítíð og skal skjótt til upptøkuroynd til MuMi (Musikkskúlamiðnám), sum gevur honum stórar møguleikar innanfyri tónleikakarrieru.

Andrias hevur sera stóran áhuga fyri djórum og ætlar at fara at ganga á tekniska studentaskúlalum í Klaksvík og møguliga blíva zoologur. Í frítíðini venur hann so violin, sum honum dámar væl – men enn hevur Andrias ikki avgjørt, hvat hann vil verða, tá hann verður vaksin. Rúni, harafturímóti, vil verða filmstónasmiður.

Í løtuni gongur Rúni á fyrsta árinum í studentaskúlanum í Hoydølum. Ætlanin er at koma inn á konservatorium í Danmark og har fylgja dreyminum. Rúni hevur verið við fyrr í Ung í Føroyum nakrar ferðir, men hesaferð er fyrstu ferð hjá Andrias, sum er sera spentur uppá at sleppa at møta øðrum ungum listafólkum.

Kristian Magnus Larsen

Kristian hevur spælt klaver í 6 ár, har hann hevur fingið undirvísing í Musikskúlanum. Stílurin hjá honum er at gera cover-løg av sangum, ið honum dámar – sum varierar frá klassiskum sangum til modernaðan tónleik.

Eisini hevur Kristian eina YouTube-kanal, har hann leggur út videoupptøkur av sínum cover-løgum, sum hann spælir á klaverinum heima hjá sær. Upptøkurnar verða gjørdar við heimakamera, men loyva kortini góða ljóðgóðsku.

Til pallroyndina spældi Kristian sína egnu útgávu av tveimum vældámdum modernaðum sangum, ávikavist Party Rock Anthem hjá LMFAO og Rolling In The Deep hjá Adele. Inspiratión fær hann vanliga frá cover-tónleikarum, sum gera sínar egnu útgávur av sangum. Kristian sigur, at hann roynir sum tónleikari at finna sín egna stíl.

Sasho Bjartsson og Harald Joensen

Sasho og Harald framførdu egið verk í dag. Framførslan var fyrst ein sangur, ið eitur “Dansurin”, og síðani stuttur skemtiligur sjónleikur. Orðini til sangin eru skrivað av Karl Weihe Viðstein, meðan Sasho hevur lagt lag til.

Sasho arbeiðir í løtuni í Dekoprint, meðan Harald gongur í 2. s í Hoydølum. Harald hevur drama á miðstig, men hevur eisini valt nøkur vísindalig hástigsfak.

Teir báðir eru við í filmsbólkinum TaðFilmar, sum eru kendir millum føroyingar á YouTube. Tað byrjaði við filmsskeiði í Nólsoy, Nollywood, har teir møttust og lærdu at gera filmar. Tað kom skjótt upp at koyra hjá teimum, og teir blivu væl dámdir á internetinum fyri teirra tónleikavideo og humor. Teir hava millum annað gjørt videoløg fyri Kularrøtur og Strok, og teirra eldhugi bara veksur av tí sama.

Um framtíðina eru teir eitt sindur í iva, men eitt vita teir við vissu: Teir vilja vera við til at samskipa tiltøk kring landið, alt frá barnatiltøkum til stór filmstiltøk – stórt sæð eitt hvørt tiltak, sum kann fremja framgongd í Føroyum.

Ung í Føroyum hevur 8 fantastisk stórasystkin

2012-02-17T01:15:00.000-08:00

At fáa eina so stóra stevnu sum Ung í Føroyum at mala runt krevur nógvar hendur. Til Ung í Føroyum eiga ung hjálparfólk, ið vit kalla stórasystkin, nakrar av hondunum. Uppgávur teirra eru bæði kreativar og praktiskar.

Stórasystkini hava øll verið við á Ung í Føroyum fleiri ferðir og eru nú blivin ov gomul at luttaka á stevnuni. Hvør verksmiðja hevur eitt stórasystkin knýtt at sær og stórasystkini hesaferð eru:

Bjarni Falkvard Joensen, sirkus

Jimmy Jønsson, sjónleikur

Lydia Hansen, myndlist

Nicolai Jensen, tónleikur

Regin í Dali, skriving

Sunniva Holm Poulsen, frásøgn

Finn Haraldson, tíðindi

Jóhanna Magnusardóttir, framleiðsla.
Jóhanna er eisini "yvirstórasystkin", hon samskipar stórasystkinabólkin.

Her er eitt sindur um tey (enn eru ikki øll cv innkomin, tey koma so við og við...)

Jimmy Jønsson

Eg eiti Jimmy Jønsson og eg eri av Nesi, hóast eg eri føddur í Svøríki.

Eg byrjaði at intressera meg fyri at syngja, tá eg gekk í 6. ella 7. klassa, og eg havi altíð dáma at spælt býtt, sum forklárar hví eg dámi væl at spæla sjónleik.

Eg havi luttikið í "Ung í Føroyum" tríggjar ferðir; tvær ferðir í tónleiki og eina ferð í sjónleiki. So havi eg eisini luttikið í "Ung i Norden" eina ferð, har ið eg eisini var á sjónleikaverksmiðjuni. Um alt hettar ikki er nokk, so var eg eisini við í sangleikinum HAIR, sum bleiv spældur í Norðurlandahúsinum, so man kann siga at sjónleikur og tónleikur ganga hond í hond í mínum lívið! :-)

Lydia Hansen

Navnið er Lydia Hansen, eg eri 19 ár og eri úr Gøtugjógv. Í 2011 gjørdist eg studentur.

So leingi sum eg minnist, so hevur mær altíð dámað væl at tekna og mála. Tað er ein áhugi, ið er komin fyri at vera. Fyri skjótt 6 árum síðani fekk eg so mítt fyrsta myndatól í føðingardagsgávu, og líka síðani tá havi eg tikið myndir. Eg havi gjørt nógv ymiskt tá tað kemur til myndatøku; eitt nú fløguhúsar, mótamyndarøðir og ymiskt annað. Eigi ymiskar myndir í bløðum, bókum, og í løtuni havi eg eina mynd, ið verður sýnd fram á einum museum í Svøríki. Sum heild hevur myndatøka (og myndlist) sera nógv at siga í mínum lívi, og tað er nakað, ið eg heilt sikkurt ætli mær víðari við.

Eg havi verið við í UíF tríggjar ferðir fyrr, og tað hevur altíð verið líka stuttligt og áhugavert og ikki minst læruríkt. Eg kundi tí ikki siga nei, tá ið Jóhanna spurdi meg, um eg hevði hug at vera stórasystkin í ár.

Pallroyndirnar byrja

2012-02-16T05:20:00.000-08:00

Um hálvan tíma fara pallroyndirnar til fríggjakvøldssýningina á Ungum í Føroyum í gongd.

Tann fyrsta helvtin av teimum, sum skulu royna pallin í Norðurlandahúsinum, eru uttan iva á veg niðan.

Pallroyndirnar eru nógvar og tí er bert stutt tíð til hvønn.

Stundir eru ikki at venja á pallinum, bara at royna at standa í pallljósinum og royna tøknina.

Í morgin kemur hin helvtin, serliga tey, sum ikki búgva í Havn, so teimum ikki nýtist at koma í Norðurlandahúsið tvær ferðir somu viku.

Birna Heinsen og Rakul Thomsen sum báðar skulu framleiða stóru sýningina sunnudagin, fara saman við verkætlanarleiðara Rakel Helmsdal, at standa fyri pallroyndunum.

Dagsskrá fyri stevnuna

2012-02-13T09:08:00.000-08:00

HER á heimasíðuni er endaliga dagsskrá fyri stevnuna.

Stórur felagsfundur

2012-02-10T05:31:00.000-08:00

Í morgin, leygardagin 11. februar, byrjar Ung í Føroyum so smátt. Kl. 15 hittast allir luttakarar á einum stórum felagsfundi í Norðurlandahúsinum.

Her kunnu tit ungu hitta hinar lutakararnar á stevnuni, og serliga tey, sum tit fara at virka saman við á verksmiðjunum. Flestu verksmiðjuleiðarar fara eisini at verða til staðar, teir, sum ikki fáa komið, fara at vera tøkir á telefon ella skype.

Tað er av alstórum týdningi, at allir luttakarar møta. Verksmiðjuleiðararnir fara her at lodda dýpi, at vita hvørju áhugamál tit hava, og eftir hesum fara teir at leggja sjálva stevnuna til rættis. Kanska fara teir eisini at geva tykkum onkra áhugaverda uppgávu heim við at hugsa um hesa vikuna, áðrenn stevnan byrjar.

Við á fundin skulu tit hava:

Ein persónaligan lut (kann vera alt frá eini svávuldós til eitt lummaur...) ella ein setning ella eina mynd. Spyr ikki hví, endamálið er loyniligt :)
Kvittan fyri goldið luttakaragjald. Hetta er alneyðugt – tey sum ikki hava goldið, verða strika av listanum. Luttakaragjaldið er 600 kr og skal gjaldast á konto nr. 9181 1200196 í Eik. Minst til, at viðmerkja navn títt.
Tey, ið sýna fram myndlist, skulu hava myndir, standmyndir ella annað, tey vilja sýna, við, soleiðis at framsýningin kann leggjast til rættis í góðari tíð.
Tey, ið skulu sýna fram á palli, skulu hava neyvar upplýsingar um framførsluna: heiti og longd (tó í mesta lagið 5 min.) á tykkara innslagi og lista yvir tað, sum neyðugt er av tøkni ella tilfari. Tey, sum brúka t.d. fløgur, skulu hava eitt avrit, og lata tað verða eftir í Norðurlandahúsinum.
Tey, sum hava verk á dvd at vísa fram, skulu lata okkum eitt avrit, og sjálvi hava upprunabandið/fløguna við á stevnuna.

Vit rokna við, at øll møta á hesum fundinum um ikki góðar grundir forða fyri tí (t.d. sjúka). Ber tað tær ikki til at koma, so gev boð frammanundan. Kemur tú ikki á fundin og hevur heldur ikki givið boð, rokna vit við, at tú ikki ætlar tær á stevnuna, og ein á bíðilistanum fær títt pláss.

Hesar eru reglurnar fyri Ung í Føroyum í Norðurlandahúsinum:

Tit, sum eru við á stevnuni, skulu møta stundisliga og vera við til ALT, t.v.s. frá fríggjadag seinnaparti til sunnukvøldið eftir stóru framførsluna.
Tað ber ikki til at fara heim ímillum, gera persónlig ørindi ella líknandi. Stevnutíðin er alt ov stutt at taka tíð burturav til annað!
Ung í Føroyum er eitt royk- og rúsfrítt tiltak, og brot á hesa fyriskrift førir til, at viðkomandi ikki sleppur at halda fram á stevnuni.

Vit gleða okkum ómetaligt til at hitta tykkum øll!!

Brøvini farin út - hevur tú fingið títt?

2012-01-30T02:39:00.000-08:00

Teldubrøvini til øll, sum hava søgt um at sleppa inn á Ung í Føroyum 2012 fóru út fríggjadagin tann 27. januar. Øll skuldu hava fingið bræv, bæði tey, sum eru sloppin inn, tey, sum eru á bíðilista og tey, sum eru biðin at søkja aftur næstu ferð vegna plásstrot.

Tíverri letur tað til, at nøkur eru, sum ikki hava fingið sín teldupost, so tað er av alstórum týdningi, at tit kanna tykkara teldupostbústað, altso tann, sum tit skrivaðu í umsóknina. Hevur tú ongan teldupost fingið frá okkum, kanna so spam-filtrið!! Er framvegis onki, set teg so í samband við okkum á t-post uif@nlh.fo ella ring 216596 (Rakel) ella 210125 (Hedvig).

93 vilja á Ung í Føroyum

2012-01-21T08:38:00.000-08:00

So er tekningin til Ung í Føroyum 2012 afturlatin, og tað er greitt, at áhugin er ikki minkaður, hóast stevnan nú hevur 11 ár á bakið. 60 sleppa við á stevnuna og heili 93 ung í øllum landinum hava søkt um at sleppa við á stevnuna.
Tað verður ikki lætt hjá teimum, sum skulu velja út, tí tey allarflestu av hesum hava eisini teknað seg við einhvørjum at vísa fram, nakað sum gevur fyrimun fyri at sleppa inn.
Næstu dagarnar fer útvalið fram og í seinasta lagið tann 1. februar fáa øll boð, um tey sleppa við ella ikki.
Tey, sum ikki sleppa við í fyrstu atløgðu, verða sett á bíðilista.

Verksmiðjuleiðarar og verkætlanarleiðarar gleða seg sera nógv at sleppa at arbeiða saman við hesum ágrýtnu listarligu ungu eitt heilt vikuskiftið!

Í meðan tit bíðja eftir brævinum, kunnu tit hyggja at stevnumyndum frá 2010.

Ung í Føroyum 2010

Í morgin á midnátt er freistin úti!

2012-01-19T01:16:00.000-08:00

&lt;p&gt;&amp;lt;a href="http://www.7is7.com/otto/countdown.html?year=2012&amp;amp;amp;month=1&amp;amp;amp;date=20&amp;amp;amp;hrs=23&amp;amp;amp;ts=24&amp;amp;amp;tz=0&amp;amp;amp;min=59&amp;amp;amp;sec=0&amp;amp;amp;lang=en&amp;amp;amp;show=dhms&amp;amp;amp;mode=t&amp;amp;amp;cdir=down&amp;amp;amp;bgcolor=%23000000&amp;amp;amp;fgcolor=%23F78F21&amp;amp;amp;title=So%20langa%20t%ED%F0%20hevur%20t%FA%20enn%20at%20tekna%20teg%20til%20U%EDF2012"&amp;gt;So langa tíð hevur tú enn at tekna teg til UíF2012&amp;lt;/a&amp;gt;&lt;/p&gt;

Nú eru bert tveir smáir dagar eftir at tekna seg til tað stórstu og stuttligastu ungdómsmentanarstevuna í Føroyum.

So nú er tað lata telduna upp, trýsta teg inn á TEKNINGARSKJALIÐ og skriva teg inn.

Hevur tú eitthvørt at vísa fram fyri hinum luttakarunum fríggjakvøldið (eina mynd, eitt foto, ein sang, eitt design, eina standmynd, eina yrking, eina søgu, eitt lag, ein firvald at rulluskoytum, ja stutt sagt alt, sum títt hugflog ikki setur mark fyri), so hevur tú eitt sindur betur kjans at sleppa við á stevnuna, men tað merkir kortini ikki, at tú ongan kjans hevur, um tú ikki hevur nakað at vísa. Tað er tín brennandi áhuga fyri at skapa okkurt listarligt, sum hevur okkara størsta áhuga!!

Kom á Ung í Føroyum, lær eina rúgvu og fá nýggjar vinir, sum hava somu áhugamál sum tú!

Ung í Føroyum er har eldhugaði ung í Føroyum hittast og skapa nakað ótrúligt saman.

Nú styttist til tekningarfreistina!

2012-01-09T06:47:00.000-08:00

Nú eru bert 11. dagar eftir at tekna seg til Ung í Føroyum 2012! So nú er at skunda sær.

Far inn HER og tekna teg.
Og far inn HER og fá at vita hvussu, tú teknar teg.

Har eru so nógvir spurningar, sum tú kanska hevur hug at vita um Ung í Føroyum, men tí hava vit eisini ráð fyri: Fari inn á "Alt tær leingist at vita" um Ung í Føroyum og har er vónandi svar uppá tað mesta.
Finnur tú heldur ikki svarið har, so ring til Hedvig (210 125) ella Rakel (216596) ella send ein sms (minst til títt navn).

Ungir dramaturgar skipa endabrestin

2012-01-05T05:04:00.000-08:00

Ung í Føroyum hevur nú meira enn 10 ár á baki, og nøkur av teimum, sum vóru við á fyrstu stevnunum, eru nú vaksin og hava tikið listarligar útbúgvingar. Tvær teirra eru Birna Heinesen og Rakul Thomsen, skjótt verða lidnar at lesa dramaturgi. Tær fara at samskipa stóru almennu endasýningina á UíF 2012 sunnudagin 19. februar.

Hetta siga tær sjálvar:

Frá endasýningini á UíF2010

Vit gleða okkum at síggja, hvat tit ungu hava at bjóða, serliga gleða vit okkum til sýningarnar fríggjakvøldið. Vit gleða okkum, saman við tykkum, at vísa føroyingum, hvussu nógv ung og evnarík listafólk vit eiga, og ætla okkum at verða við til at skapa eina sýning, har allar verksmiðjurnar ganga hond í hond og rúm er fyri listarligum margfeldi. Tá áskoðararnir hava sett seg væl til rættis í salinum, og ljósið á pallinum verður tendrað fara vit at vísa eina fantastiska sýning. Hetta er Ung í Føroyum 2012!!

....og kanska er sýningin byrjað, áðrenn hon byrjar!

Um Birnu:

Hey tit, eg eiti Birna Heinesen, eri 25 ár, og lesi dramaturgi á Aarhus Universiteti. Mær hevur altíð dámt væl sjónleik, men eisini alla aðra list, og eg havi verið so heppin, at eg framvegis var ung, tá Ung í Føroyum byrjaði, so eg havi eisini verið við sum luttakari!

Tá eg gjørdist ov gomul at verða luttakari havi eg verið við sum stórasystkin og fyriskipari, og tað hevur verið sera spennandi. Nú eri eg so vorðin so ”gomul”, at eg sleppi at samskipa sýningina saman við Rakul og øllum tykkum ungu!! Tað verður feitt!!

Um Rakul:

Eg eri 23 ár, búgvi í Aarhus og lesi Dramaturgi og Film og tv. Eg havi altíd havt fingrarnar í tí kreativa arbeiðinum, har sjónleikur, tónleikur og sangur eru mítt lívins gull. Eg fann "gullið" niðri í Sjónleikahúsinum, tá eg sum 9 ára gomul, byrjaði á barnasjónleikaskúla hjá Hedvig Westerlund. Síðan hevur sjónleikur og tónleikur verið ein stórur partur í mínum lívið. Eg havi verið við nógvnum sjónleikum í Føroyum, so sum: "Kúlla Knút", "Grease", "Fame", "Í Geyma" og "Ólavsøkukabarettin 2008 og 2010".

Lat tínar listarligu dreymar gerast veruleiki

2012-01-02T09:55:00.000-08:00

Hetta tíðindaskrivi er í dag sent til allar miðlarnar:

Ung í Føroyum 2012

– Lat tínar listarligu dreymar gerast veruleiki

Stevnan har tey ungu kreativu hittast verður nú aftur! Tann 17. til 19. februar letur Norðurlandahúsið hurðarnar upp fyri 60 ungum í Føroyum, sum tora, duga og vilja. Øll, sum eru 13 ár, men enn ikki 19, kunnu tekna seg innan tann 20. januar.

Til ber longu nú at tekna seg á www.nlh.fo!

11. stevnan

Tann 17. februar fer 11. UíF-stevnan av bakkastokki, tann sætta í Norðurlandahúsinum.

Á Ungum í Føroyum hittast ung úr øllum landinum, sum hava listarlig áhugamál ella fáast við eitthvørt, ið hevur við list at gera. Her kunnu tey hitta onnur, sum hava somu áhugamál og læra nýtt av hvørjum øðrum og av kendum føroyskum og útlendskum listafólkum.

Og her er tað, at ung kunnu vísa Føroyum, hvat ungdómsmentan er, tá ung sjálvi seta dagsskránna.

Fyri øll kreativ ung

Ung í Føroyum hevur onki krav um royndir, stevnan er fyri øll ung, sum eru listarliga áhugaði, bæði til tey, sum hava nógvar royndir, til tey, sum akkurát eru byrjaði, ella til tey, sum bara hava hug at fara í gongd við nakað listarligt.

Tey kunnu royna nýggjar leiðir og mennast innan sítt listaøki, men tað ber eisini til at royna okkurt annað enn tað, tey fáast við til dagligt.

Her kunnu ung hitta onnur, sum fáast vit tað saman sum tey, hitta javnlíkar og eisini síggja, at alt ber til – bert hugflogið setur markið.

Hvat er á skránni?

Fríggjakvøldið verður listaframsýning og sýning av teimum tónleika-, sjónleika- dansi- ella filmsverkunum og øðrum, tey ungu sjálvi hava fyrireikað frammanundan.

Leygardagin verður arbeitt í verksmiðjum allan dagin. Á kvøldi er hugnakvøld og opin pallur.

Sunnudagin verður stóra endasýningina fyrireikað, og sunnudag seinnapart kunnu øll fólk koma at síggja, hvat er avrikað.

Ung í Føroyum er skipað sum ein lega. Tey ungu sleppa at nýta alt Norðurlandahúsinum hetta vikuskiftið, og gist verður í B36-húsinum. Ung, sum fyrr hava verið við, men eru fylt 19, eru hjálparfólk og “stórasystkin” alla stevnuni.

Kapping?

Ung í Føroyum er ikki ein kapping. Tað er ein møguleiki at vísa fram, royna nýtt, menna, tað tey duga og arbeiða saman við øðrum listarliga áhugaðum og virknum í sínum aldri. Tað er ein møguleiki at vísa umheiminum, hvat ung list er í dag, hvat tey halda vera spennandi og viðkomandi.

Ung í Føroyum er ein týðandi sýnisgluggi fyri føroyska ungdómslist.

Tað er hent (og kann henda aftur), at onkur sær eina spennandi sýning ella eitt spennandi listaverk og vil nýta tað. Okkurt av tí, sum hevur verið framleitt á stevnuni, hevur verið sýnt í øðrum høpum, her heima ella í øðrum londum.

Hvørji eru verksmiðjuleiðararnir?

Verksmiðjuleiðararnir eru øll yrkislistafólk, fólk, sum liva av sín list. Tey flestu eru føroyingar, men onkuntíð eru listafólk boðin úr øðrum londum.

Í ár verða tey hesi spennandi og kendu listafólkini verksmiðjuleiðarar á stevnuni: Lena Anderssen og Niclas Johannesen, tónleikur, Brandur Patursson, myndlist, Petur Pólson, skriving, Annfinnur Heinesen, sjónleik, Joël Colas, sirkus og Kate Corkery, frásøgn. Tvær ungar kvinnur, Birna Heinesen og Rakul Thomsen, sum fyrr hava verið luttakarar á stevnuni, og sum nú verða lidnar at lesa dramaturgi, fara at samskipa almennu endasýningina.

UíF á netinum

Ung í Føroyum hevur nú sín egna tíðindablogg ungiforoyum.blogspot.com. Øll tíðindi og upplýsingar eru sjálvandi at finna á heimasíðuni www.ungiforoyum.info og á Facebook-bólkinum við.

Allar upplýsingar um UíF eru at finna á www.ungiforoyum.info og á www.nlh.fo.

Gev gætur: tekningin er byrjað og er einans online. Tekningarfreistin er 20. januar.

Skeiv dagfesting

2011-12-19T01:11:00.000-08:00

Av misgávum kom skeiv dagfesting at standa í tekningarskjalinum. ORSAKA!
Tekningarnar skulu vera inni í seinasta lagið 20. januar á midnátt. Eftir hetta ber IKKI til at tekna seg!!

Tú kanst tekna teg á www.ungiforoyum.info. Har eru eisini allar upplýsingar um
stevnuna. Og spyr bara, um tað er okkurt tú ivast í!

Tekna teg til Ung í Føroyum 2012

2011-12-16T12:36:00.000-08:00

So, nú er tað endiliga klárt: tekningarskjalið til UíF 2012!!

Og heimasíðan er aftur virkin!!

So geri so væl, fari inn á www.ungiforoyum.info beinan vegin og kunnið tykkum um komandi stevnuna.

Tað er ikki neyðugt at skunda sær at tekna seg. Tekningarfreistin er 30. januar og tað er ongin fyrimunur at tekna seg tíðliga.

Vilt tú royna at tryggja tær pláss á stevnuni, so er at finna eitthvørt at vísa fram á palli ella á framsýningini fríggjakvøldið á stevnuni, tí tey, sum hava nakað at vísa fram, fáa fyrimun, um meira enn 60 tekna seg til stevnuna.

So gevi tykkum bara góðar stundir at gera eina góða umsókn.

Kendur sjónleikari leiðir sjónleikaverksmiðjuna

2011-12-14T03:20:00.000-08:00

Annfinnur Heinesen fer at leiða tykkum inn í sjónleikaverðina.

Hetta sigur Annfinnur um verksmiðjuna:

"Vit fara at arbeiða við orku, við improvisasjón, við áliti, bæði á teg sjálvan og onnur.

Vit kasta okkum út í teir fantastisku eginleikarnar sum sjónleikur hevur, til at skapa samband millum menniskju, gjøgnum samstarv og samanhald.

Vit fara at royna ymiskar "sjangrur", og í felag finna vit kanska eitt gott evni og ein spennandi stíl, so vit kunnu gera ein lítlan leik?

Á hesari leinkjuni standa nakrir av teimum leikunum, eg havi gjørt."

Ung í Føroyum-myndir

2011-12-14T01:09:00.000-08:00

Nógvar góðar myndir eru frá Ung í Føroyum-stevnunum. Meðan heimasíðan er óvirkin, kunnu tit koma beinleiðis inn á tær HER

Dugnalig tónleikaraduo hevur tónleikaverksmiðju

2011-12-12T06:00:00.000-08:00

Niclas og Lena høvdu eisini væleydnaða tónleika- og sangskrivaraverksmiðju á UíF 2010. Tá fekk Lena tíverri forfall, men vit eru spent at fáa tey bæði hesaferð!

Hetta siga Niclas og Lena um verksmiðjuna:

"Í tónleikaverksmiðjuni fara vit at leggja serligan dent á sangskriving. Hevur tú ongantíð áður skrivað ein sang, men ynskir at royna tað, so er hetta rætta høpið. Hevur tú longu skrivað løg og ynskir at menna teg, so er hetta eisini rætta staðið at fáa íblástur og vegleiðing innan sangskriving. Umframt at skriva sangir verður eisini arbeitt við samanspæli og at geva tykkara sangum eitt sound og ein tónlistarligan samanhang, so tit sum tónleikarar og sangskrivarar kunnu framføra tykkara nýggju verk fyri lurtandi fjøld. Tað verður við fullum drøni. Tað verður spennandi. Og tað verður stuttligt!"

Lena Anderssen er songkvinna og sangskrivari, ið júst hevur givið út sína 4. fløgu undir egnum navni. Lena hevur framført sín egna tónleik kring allan heim.

Niclas Johannesen

Niclas Johannesen hevur verið partur av yvir hundrað tónleikaútgávum, antin sum tónleikari, sangskrivari ella produsari.

Yrkjari og tónleikari við skriviverksmiðju á UíF 2012

2011-12-12T05:49:00.000-08:00

Petur Pólson hjálpir tykkum at vekja orðini!

Hetta sigur Petur um verksmiðjuna:

"Ein verð fyri seg.

Har tú ikki ert tengdur at ljósi, ljóði ella skuggum.

Har tú sleppur inn um mørkini. Og út um they.

Har forðing ikki er.

Har ongin dómur er.

Har tú sleppur at siga tað tú vilt.

Har tú sleppur at tiga tað tú vilt.

Her er ongin, sum sigur tær, hvør tú skalt vera, hvussu tú skalt vera, hvat tú skalt hugsa, hvussu tú skalt hugsa. Tú setur tíni egnu mørk og sprongir tey. Ver vælkomin, tak teg sjálvan við, og eitt sindur av lívinum og øllum tí meldri, sum er í tí.

Kom innar har ongin happar, fordømir ella sleppur at vera ein forðing."

Um Petur:

Eg eri 39 ára gamal (fylli 18. január). eg havi skrivað síðani eg sum 8 ára gamal fekk eina skrivimaskinu frá ommu míni. Tá eg kom heim, læsti eg meg ofta inni og skrivaði. Alt. Søgur, yrkingar, sangir, hugleiðingar. Onki hevði sum so nakað endamál. beinanveg. Men seinni. Eg kendi tað - og kenni tað enn - sum at skriva gevur mær fullkomið frælsi, ella so nær fullkomnum frælsi, sum eg kann sleppa at smakka tað. har eru ongar avmarkingar. Ongin happar, trýstir, glepsar harraboð, onki mjarr, ongin júkar. Tú hevur í veruleikanum frælsi at gera og siga og hugsa og kenna og skriva alt, sum fellur tær í huga. eg trúgvi uppá, at heimurin bert hevur tey mørk, sum tú sjálv/ur skapar. Í okkara hugaheimi snýr tað seg um at finna sannleikan í tí, sum tú hevur uppá hjarta. og - vónandi - fáa tað niður á blað. ella onkra aðrastaðni.

Eg havi givið út 5 yrkingarsøvn. vann bókmentavirðisløn í 1997. Eg havi spælt tónleik síðani 1992. mest við bólkum sum Visible Fish og Clickhaze. havi eisini givið tvær fløgur út undir egnum navni. Koma (2005), Tokyó (2009) og Transit (2011).

http://www.facebook.com/peturpolsonmusic

Spennandi ung list á UíF 2012

2011-12-12T05:34:00.000-08:00

Brandur Patursson fer hesaferð at seta ferð á listina!

"Vælkomin í eitt trygt, kreativt og opið umhvørvi, har onki er bannað. Hvar "problemir" ikki existera, men møguleikar trívast. Tað eg kann hjálpa tykkum við, er, at geva tykkum eina kenslu av, hvat list er, og hvussu matriali ávirkar úttriki, og hvussu rúm og ljós ávirkar list.

Eg sjálvur havið arbeit við list í 17 ár, eg havi arbeitt við blandaðum tøkni, jarn, glas, ljós, træ, latex, papír, foto, máling, stoff, isoleringsskúm og mongum øðrum. Komið og upplivið eina síðu av tykkum sjálvum, ið tit ikki hava sæð fyrr."

Gitin franskur klovur á Ungum í Føroyum 2012

2011-12-12T05:25:00.000-08:00

Joel Colas fer at leiða sirkusverksmiðjuna. Tað gjørdi hann eisini á UíF 2010, og var tað ein stór uppliving fyri tey sum luttóku og fyri tey, sum hugdu at stóru almennu felagssýningini sunnudagin á stevnuni.

Joel Colas

er útbúgvin klovnur og línudansari frá Centre National des Arts du Cirque de Châlons en Champagne í Fraklandi og arbeiðir í fleiri sirkusum sum klovnur og línudansari.

Joel hevur ferðast nógvastaðni í heiminum við sýningum sínum, m.a. eisini í Føroyum har hann tvær ferðir hevur verið, fyrst við sýningini "KAO" og so við "A & O présentent &".

Um verksmiðjuna sigur hann:

"Fyri at geva tykkum eina mynd av tí, vit fara at gera :

Tak varliga ein einfaldan og einslittan lut. Hygg væl at honum, snodda til hann, nem við hann, flyt hann runt á ymsar hættir til hann at enda tosar við teg. Um hann onki sigur, miss ikki mótið. Hugsa ikki so nógv og byrja umaftur við opnum eygum og oyrum.

Lat lutin javnviga á høvdinum á tær, so tú betur fært lurtað eftir honum.

Um hann framvegis onki sigur: Gevst at fara so væl við honum. Kitla hann, rist hann, blaka hann upp í loft ella lat hann rulla ella glíða eftir gólvinum, ger alt møguligt klikkað við hann, alt sum fellur tær inn.

Hevur hann enn onki sagt, so vita, hvat tú kanst siga, við øllum tí, sum tú longu hevur gjørt."

Spennandi írsk frásøgukvinna á Ungum í Føroyum

2011-12-12T04:04:00.000-08:00

Her koma so fyrstu tekstirnir frá verksmiðjuleiðarunum!

Kate Corkery er írskt frásøgukvinna. Hon er yrkisfrásøgufólk í Irish Centre í London, men upptraðkar eisini og heldur skeið á festivalum, mentanarhúsum og skúlum um allan heim.

Hon kallar skeiðið hjá sær “getting the most from your story”, ein interaktiv verksmiðja, har Kate kann vísa á lættar, munagóðar og stuttligar háttir at siga frá søgum.

Kate tosar enskt, men eitt stórasystkin verður til staðar, sum kann umseta eftir tørv.

HER er ein framførsla hjá henni.

Verksmiðjuleiðarar 2012

2011-12-09T03:53:00.000-08:00

Og so tað sum vit øll eru mest spent at hoyra um:

Hvørji verða verksmiðjuleiðarar hesaferð?

Vit hava savnað ein bólk av frálíkum listafólkum:

Brandur Patursson, sum fer at leiða myndlistaverksmiðjuna.

Lena Anderssen og Niclas Johannesen, sum fara at leiða tónleikaverksmiðjuna.

Petur Pólson, sum fer at leiða skriviverksmiðjuna.

Annfinnur Heinsesen, sum fer at leiða sjónleikaverksmiðjuna

og so tvey spennandi listafólk úti úr stóru verð:

Joel Colas, sum fer at leiða sirkusverksmiðjuna og

Kate Corkery, sum fer at leiða frásøguverksmiðjuna.

Til at skipa fyri stóru felagssýningini sunnudagin 19. februar hava vit fingið tvær dugnaligar ungar kvinnur:

Birnu Heinesen og Rakul Thomsen, sum báðar verða lidna at lesa dramaturgi komandi summar.

Projektleiðarar fyri verkætlanini eru aftur í ár Hedvig Westerlund-Kapnas og Rakel Helmsdal.

Søgan um Ung í Føroyum - 2. partur

2011-12-09T03:50:00.000-08:00

Fyrsta kvøldið á stevnuni vísa tey ungu fram ymiskt, sum tey sjálvi hava fyrireika heimanifrá, antin á palli ella á listaframsýning. Hetta er ein innanhýsis sýning fyri øll sum eru við á stevnuni.

Síðani eru listaverksmiðjur, har arbeitt verður intensivt í hálvanannan dag.

Alt endar við stórari framførslu, har arbeiði frá verksmiðjunum verður sett saman og víst fyri almeninginum.

Stevnurnar eru annaðhvørt ár í Norðurlandahúsinum, og eru skipaðar sum legur við gisting.

60 ung sleppa vanliga at luttaka, og tey, sum tekna seg við einhvørjum at vísa fram á innanhýsis sýningini fáa framíhjárætt, um fleiri enn 60 tekningar koma inn.

Í 2005 og 2007 vóru 4 minni stevnur úti um landið, sum kommunurnar fíggjaðu. Hetta gjørdi, at enn fleiri ung fingu møguleikan at luttaka, men tíverri hava kommunurnar seinastu árini ikki havt orku til at stuðla tiltakinum.

Søgan um Ung í Føroyum - 1. partur

2011-12-09T03:42:00.000-08:00

Komandi Ung í Føroyum-stevnan er tann 11. stevnan í røðini síðani UíF var sett á stovn í 2001.

Fyrsta stevnan varð hildin í Norðurlandahúsinum mánaðarskiftið januar/februar 2001.

Endamálini við stevnunum eru býtt upp í trý:

At skapa ein "pall" fyri føroyskari ungdómsmentan. T.v.s. at her skal bera til hjá øllum áhugaðum at síggja, hvat føroysk ung hava áhuga í á mentanarøkinum, tá tey sjálvi avgerða, hvat ungdómsmentan er. Hetta verður gjørt við almennari felagssýning og opnum húsið.
At geva ungum innlit í, hvussu tað er at arbeiða listarliga av álvara. Hetta verður gjørt við at geva teimum ungu møguleikan at arbeiða á listaverksmiðjum og fáa leiðbeinan av yrkislistafólkum.
At geva ungum í øllum landinum, sum eru listarliga áhugaði, møguleika at hittast og soleiðis nøra um mentanararbeiði, -samstarv og áhuga.

Stevnurnar eru fyri øll ung í aldursbólkinum 13 til og við 18 ár, sum eru listarliga virkin.

Tey skulu sjálvi tekna seg til stevnuna, sum verður kunngjørd í fjølmiðlunum og gjøgnum skúlaskipanina.

Ung í Føroyum nýggjan blogg

2011-12-09T02:17:00.000-08:00

Ung í Føroyum 2012 standa nú fyri durunum. 17. til 19. februar verður aftur stór ungdómsmentanarstevna í Norðurlandahúsinum, har 60 ung úr øllum landinum fara at hittast og gera spennandi, ótrúlig og nýskapandi listaverk í ymsum listagreinum.

Heimasíðan hjá Ungum í Føroyum er óvirkin í løtuni, tí hava vit valt fyribils at leggja allar nýggjar upplýsingar út her á bloggin og sjálvandi eisini á heimasíðuna hjá Norðurlandahúsinum.

Skjótt fer at bera til at tekna seg til stevnuna og tí fara vit at leggja brellbitar frá verksmiðjuleiðarunum út her fyrsta dagin.

Meðan tit bíðja, kunnu tit hugna tykkum við at hyggja at myndum frá stevnunum, ið hava verið, HER!